لبيه ياللي وحدك إن قلت لبيه
يذبحني لبيهك ويذبحني الصوت

وأن طاح قلبي ميتـ(ن) فيك خليه
ياحي قلبـ(ن) طاح وياحيه الموت

ما قلت احبك لجل وقتي أسليه
لا والذي نجا نبيه من الحوت

والحب لو هو سر وأقدر أخبيه
ماقلت أحبك حتى وشفاهي سكوت

لي ناظرٍ ما غير شخصك يمليه
كأنك دواي و شوفتك طب منعوت

وأن ضاق بالي أذكر أسمك وأغنيه
وأتخيلك علّ وعسى طيفك يفوت

أهواك وهمي كيف قلبك أهنيه
من كثر ما أسمك في هالقلب منحوت

حتى الخطا لو جاني منك أمشيه
وأن ما مشى أخلق لك أعذار وثبوت

وإيش الذي يخطر في بالك ؟؟ وأسويه
لو حتى في وسط البحر أبني بيوت

ياللي البحر لو جا في بالك تحليه
مريت من صوبه وأمتلى سكر وتوت

لبيه ياللي لو طلبني .. ألبيه
للعاصمة حافي ولو دربه خبوت

لين أندهك ( يا فلان ) وتقول: لبيه
وأطيح من طولي ويذبحني الصوت